هاي عليكم

هاي عليكم جميعاً.. أنا إسمي .... دكتور شديد أنا لا دكتور ولا حاجة, لا بشري ولا بيطري ولا حتى حضرت دراسات عليا, ويا دوب خرجت من كليتي بالزق (وكانت كلية خاصة), بس الإسم ده أخدته من موقع كنت بدخل عليه كتير وكنت معروف هناك بيه (يا ريت لو حد فيكم من هناك ما يقولش على إسمي, خلينا كدة أحسن).. إحم.. المهم أنا مش عارف أنا عملت البلوج ده ليه (مش هقول مدونة) بس أنا لقيت إنها طريقة حلوة عشان أطلع بيها اللي جويا, واللي جوايا كتير, طلعت قبل كدة على الورق, بس محدش شافه, فمحسيتش اني طلعت, فضلت كل حاجة جوايا مستنية, خنقاني ومكدرة عليا عيشتي, بس خلاص بقى, ما بدهاش, مش هفضل طول عمري مخنوق وساكت وما بتكلمش, اللي في دماغي هيطلع على صوابعي (مش هينفع أقول لساني هنا طبعاً), واللي عاجبه أهلاً وسهلاً, واللي مش عاجبه أهلين وسهلين, نقعده ونظبطه ونديله واجبه ويشكر الراجل على الزيارة وربنا ما يقطعهاله عادة.

 أكيد طبعاً عدد الناس اللي هيشوف ويقرا المدونة دي هيبقى أقل من عدد الناس اللي شافوا الريس ماشي في الشارع على رجليه بس مش مشكلة, على الأقل بتكتب على أمل إن فيه حد في يوم من الأيام يشوف. عموماً, أنا مش عايز أرغي من أول مرة, هتعرفوني أكتر وأكتر كل ما العمر يزيد, وأوعدكم وأوعد نفسي أولاً إني مش هسيب نفسي بعد كدة مخنوق, واللي مش هيعجبني .... لا طبعاً مش هغيره, بس هاجي أكتب عنه هنا. يللا, سلام بقى عشان أنا هموت وأنام, تصبحـ... (تتمسوا على خير) د. شديد