اللي حصل 2

اللى ما حصلش

راكب التاكس وقاعد برغى مع السواق بيشكيلى همه, ومرة واحدة لقيت واحد بيجرى من جنبى ومعاة شنطة حريمى واضح طبعا إنه سارقها..

رحت فاتح الباب وجريت وراه, وبعد ماقطع نفسى فى شوارع الزمالك قدرت امسكه وآخد منه الشنطة, وفضلت ماسكه لحدما الناس طلبت البوليس وسواق التاكسى الله يكرمه جه ورايا ومعاه الست صاحبة الشنطة, وجه البوليس وخدوا الواد وتوتة توتة خلصت الحدوتة.

اللى حصل

راكب التاكس وقاعد برغى مع السواق بيشكيلى همة, ومرة واحدة لقيت واحد بيجرى من جنبى ومعاة شنطة حريمى واضح طبعا انة سارقها..

على بال ما فهمت إنه سارق الشنطة كان بعد وأنا ما كانش فيا حيل أجرى, رحت عامل نفسي عبيط وكملت رغى مع السواق.

اللي ما حصلش

راكب المترو, وكالعادة, العربيات زي علب السردين, ورجالة على ستات وبنات وشباب..

أنا كنت قاعد من أول الخط, ولقيت واحدة ست كبيرة راكبة, رحت قايملها عشان تقعد, وقعدت واستريحت, راح كل الرجالة اللي قاعدين وقفوا وقعدوا كل الستات اللي واقفين, ومبقاش فيه ولا واحدة واقفة على رجليها في الزحمة.

اللي حصل

راكب المترو, وكالعادة, العربيات زي علب السردين, ورجالة على ستات وبنات وشباب..

أنا كنت قاعد من أول الخط, ولقيت واحدة ست كبيرة راكبة, رحت قايملها عشان تقعد, وقعدت واستريحت...

واحد قام من اللي قاعدين عشان ينزل, فجأة لقيت كذا واحد بيجري عشان يلحق المكان, واتنين اتخانقوا مع بعض على المكان, وكانت ليلة..

وأنا واقف بدعي ربنا تجيلهم مصيبة تاخدهم هم الجوز.

اللي ما حصلش

واقف على كورنيش المعادي, مستني حاجة تشيلني وتوديني حلوان, مرة واحدة لقيت عربية 128 بتقطع الطريق على عربية دايو, ونازل منها واحد ظابط وواحد صاحبه...

الظابط مسك صاحب الدايو وكان عايز ينزله من العربية, بس هو ما رضيش, حاول يكسر مراية الجنب, ما عرفش, راح ماسك المساحات ودغدغها..

راجل عجوز الله يكرمه, كان واقف وبيتفرج, مسك الظابط وهزأه وأداله درس في الأخلاق, الظابط هدي شوية, وقعد يفكر, وبعد كدة اعتذر لصاحب الدايو وإداله تمن المساحات اللي اتكسرت وكمل طريقه.

اللي حصل

واقف على كورنيش المعادي, مستني حاجة تشيلني وتوديني حلوان, مرة واحدة لقيت عربية 128 بتقطع الطريق على عربية دايو, ونازل منها واحد ظابط وواحد صاحبه...

الظابط مسك صاحب الدايو وكان عايز ينزله من العربية, بس هو ما رضيش, حاول يكسر مراية الجنب, ما عرفش, راح ماسك المساحات ودغدغها..

راجل عجوز الله يكرمه, كان واقف وبيتفرج, مسك الظابط وهزأه وأداله درس في الأخلاق, الظابط قعد يجعجع ويقول له "ما أنت أصلك مش عارف هو عمل إيه, أنا هطلع ميتين أمه, أنا هعرفه مقامه".

كل ده ومحدش طبعاً قادر يتكلم, كله واقف بيتفرج وخلاص...

روحت بيتنا, كنت بتكلم مع خطيبتي, وبحكيلها اللي حصل, وقعدت أعيط من الظلم, بس هي دي كانت آخرتها... أعيط.

الهيئة المصرية العامة للواسطة

الهيئة العامة المصرية للواسطة

وفقاً لخطة الحكومة التي تهدف إلى تقديم أفضل الخدمات للمواطنين وتسهيل أمورهم الحياتية, تتم الأن مناقشة انشاء "الهيئة العامة المصرية لتنظيم الواسطة", والتي سيكون مقرها الرئيسي بوزارة الزراعة قسم الكوسة.

ووفقاً لأحد المصادر المسؤولة, فستكون وظيفة هذه الهيئة هي تنظيم الواسطة في مصر, وضمان وصول الحقوق لمستحقيها من أصحاب الوسائط وفقاً لقوانين وتنظيمات تم فيها مراعاة جميع الحالات والظروف المختلفة, ومن أهم هذه التنظيمات والقوانين:

1- تنقسم "الهيئة العامة المصرية لتنظيم الواسطة" إلى عدة قطاعات متخصصة تسهيلاً للإجراءات الادارية وخدمة للمواطن.

2- يتم انشاء القطاعات بحسب الحاجة الفعلية لها, وقد يضم القطاع أي عدد من الأقسام وذلك تبعاً للتصنيف المتفق عليه.

3- يتم انشاء قطاع "الواسطة الحربية" لخدمة المواطنين الراغبين في التقدم لكليات الحربية, ويتم ذلك عن طريق التنظيم مع القيادات في الكليات الحربية, وانشاء قاعدة بيانات خاصة بمعارف القيادات بحيث لا يحتاج المتقدم بالواسطة إلى اجراء أي من الاختبارات الضرورية للنجاح, حيث يكتفي بتزويد المسؤول في الكلية برقم البطاقة, وسيتم الكشف عنها الكترونياً في قاعدة البيانات المذكورة سابقاً, بحيث إذا وجد أنه على صلة بأي من القيادات, يتم اعفاءه من الاختبارات تسهيلاً عليه.

4- يتم انشاء قطاع "الواسطة البوليسية" لخدمة المواطنين المتقدمين لكلية الشرطة, ويتم انشاء قاعدة بيانات خاصة مثل التي تم انشاءها في قسم "الواسطة الحربية" بالإضافة إلى انشاء صندوق خاص تحت اسم "تسهيل الاجراءات" بحيث يساهم كل متقدم في الكلية بدفع مبلغ معين, يتم توزيعه على مستحقيه من إدارة الكلية رغبًة من الهيئة في حماية المواطنين من جشع البعض واستغلالهم لجهل المتقدمين بالأسعار المتفق عليها.

5- يتم انشاء قطاع "الواسطة المرورية" خدمة للمواطنين أصحاب الرخص المسحوبة (بسبب السرعة, او حزام الأمان, أو الامن والمتانة, أو السير المخالف) بحيث يتم انشاء قاعدة بيانات خاصة بأرقام السيارات التي تم التأكد من وجود صلة بين أصحابها وبعض القيادات المعروفة التي ستقوم بارجاع الرخصة بدون أي مشاكل أو عقوبات, توفيراً لوقت وجهد الطرفين, واعطاء الفرصة لظباط المرور بالقيام بواجبهم في استغلال أصحاب السيارات الأخرى.

6- سيتم دراسة طرح اشتراكات خاصة بأسعار رمزية للراغبين في الاشتراك في برنامج الواسطة نظير مبلغ معين يتم دفعه حسب نوع الواسطة التي يرغب فيها المشترك (واسطة لطابور العيش, للنجاح في امتحانات النقل, لانهاء الاوراق الرسمية, لاصدار رخصة القيادة, إلخ) وستقوم الهيئة بالإعلان عن اسعار الاشتراكات بعد اتمام الدراسات المطلوبة.

ومن الواضح أن الهيئة تتبع أخر ما توصلت اليه تكنولوجيا المعلومات إيماناً منها بأنها الطريقة الأسرع والأسهل لخدمة المواطن في عصرنا الحديث.

ملحوظة:
مطلوب مزارعين متخصصين في زراعة الكوسة للعمل في الهيئة.
تقدم الطلبات بمقر الهيئة المذكور سابقاً, ولن تقبل أي طلبات غير مصحوبة بكارت خاص من السيد رئيس الهيئة